瑪嘉烈生B記

37週時出去私家產檢，照到BB頭仔大左3週，雖然大仔個頭都係大，但難免都會擔心，去健康院復診時將問題講左比護士聽，佢本身都覺得無咩問題，後來見我咁擔心就轉介我去瑪嘉烈，瑪嘉烈了解左情況就即比催生期我(40W1)。

當日朝早8:30就去瑪嘉烈報到，見到前面有兩個媽媽，一個係已穿水，一個係陣痛痛得好密，俾姑娘話做咩唔直接去產房(催生嗰邊係屬於產前)，直接去產房就唔駛多咁多手續。我見佢地坐左一陣又被推入產房，換句話說，唔好理係咪約左當日催生，如果有咩生產徴兆就直入產房啦。

我係40W1要催生，8點半入院，等到10點左右醫生檢查宮頸，但係宮頸唔夠軟，要先塞藥等宮頸軟，中午3點塞，夜晚10點開始10分鐘痛一次，第二朝9:30再check宮頸已軟，可以催生，但產房無位,醫生覺得我唔急就由得我繼續痛🧟‍♀️🧟‍♀️，(7分鐘1次）一直keep住7分鐘痛一次到中午12點，1度都未開（其實戈陣已經係我接受唔到嘅中痛）。姑娘建議我行下企下，唔好瞓係到原來真係work即刻變到5分鐘痛一次，再check已經開左2度，即刻入產房。

所以，痛緊嗰陣唔好瞓係到，行下企下可以加快開度數，真的

到咗產房，老公可以陪產，我一痛就勁聞笑氣，但係笑氣對我黎講一啲用都冇。我每次陣痛都係喪聞幾下就頂唔順，因為好想嘔。我一離開個罩就忍唔住大叫，真係好那痛，應該係助產士入黎話我，可能係嫌我太嘈，叫我痛就聞笑氣，(但我聞完都係好痛，仲好想嘔），如是者陣痛戈陣我繼續叫，助產士立即用笑氣吸住我，其實我好痛苦，好痛好想嘔，好想快啲解脫T.T

助產士話幫我一把，由於我未穿水，佢幫我人手篤穿左，我感覺到好多液體流出黎，再感覺到好痛好痛，應該係佢人手幫我挖大開大點度數，佢一路挖一路講，「你想唔想開快啲吖，我宜家幫緊你」。其實我覺得佢嗰陣係一副似報復我咁嘈嘅樣，面目猙獰，我就好似比人插左一刀咁，唔可以出聲，好痛好痛。

佢插完我一刀之後，唔駛好耐我已感覺到勁想大便，我又大叫哀求可唔可以比我去左廁所先（我當時係真心想去廁所解決左先）助產士即刻再幫我檢查，應該係開晒度數了吧，就立刻stand by，最後用力疴左幾下就出來了。

由於笑氣聞太多，生完我係產房瞬間瞓著，到落返病房我都係勁暈勁想嘔。

成日見人話生仔有笑氣就唔駛驚，根本唔係，如果比我再㨂，我會寧願咩都無靠自己呼吸法。

JM們，加油!!